Tuesday 17 January 2012

Fakatomuaga
I te igoa o te ‘tou Aliki ko Iesu Keliso e fakatalofa atu ki a koutou Kaiga Kelisiano i te tausaga fou tenei, 2012. Se tausaga fakaopoopo tenei ki a tatou katoa i tena alofa tauanoa. Tela la, e ‘tau mo tatou o ave te fakafetai ki te Atua mo tena alofa e mautakitaki. E ui ei fuifaiga mo faigataga konei e feagai mo tatou i te olaga nei, ke manatua ne tatou i a tatou e se tuku tiaki ne te Aliki. E uke foki auala o te Aliki e mafai o fesoasoani mai ki a tatou. 
Tala fakatomua o te Nusileta
Te Nusileta tenei, Te Vaiua, se fakatokaga ne faite mo fakamalosi a Kaiga i loto i te Ekalesia Kelisiano Tuvalu, e uiga mo te olaga talitonu o latou ki te Atua. A te Kaiga, ko te faleakoga muamua eiloa o te olaga faka Tuvalu, mai tafa o te Falekaupule mo te Faletapu. Aso nei, ko uke a faleakoga ‘fou kola e mafai ei o maua a mea ‘lei mo mea se ‘lei ma te Tuvalu. Kae talitonu tatou i te Aliki ne vau ke maua ne tatou a te olaga e tafasili atu i te ‘lei (Ioane 10: 10e). I konei, ko fakapitoa ei te fakamoemoega ke muamua o fakatoka faka’lei kae toe fakama’losi aka a ‘tou Kaiga Kelisiano, mai loto loa i te Fale o te Kaiga.I luga i Suva, e isi ne Kaiga ko masani o fakaaoga ne latou a te auala o fakamalosiga tenei i olotou Kaiga. E fakaavanoa ne latou se taimi i te vaiaso o sau’tala ki te Muna a te Atua, mai tafa o Talosaga masani a Kaiga. Kae molimau foki ne tino a fuataga ‘lei mai ei. E isi ne faifeau ne fakatasi ki ei, kae se tokotasi o latou ne fai ana muna, “I taku galuega tausi fakama’losi ei a te Kaiga mai tulaga kola ne tai tutusala i loto i te vaiaso.
Mai te tulaga fakafiafia tena, ne auala ei o fakatoka ne se  Ekalesia i Tuvalu, e tasi tenei o auala o fakamalosiga e seki fai ne au. Kae matea ne au i konei a te lasi o tena aoga, e se gata ki te Kaiga, kae ki a au foki eiloa.”A te auala tenei ko te ‘Sautalaga ki te Muna a te Atua (SAMA)/ (Bible Sharing)’ e tai ‘kese malie mai te ‘Sukesukega o te Tusi Tapu (SUTUTA)/(Bible Study).’

A te auala fou tenei, SAMA, e kamata eiloa pela mo te faiga o te SUTUTA. E fai te ‘talo, faitau se tusi mai te Tusi Tapu, ko ‘tala ei ki tino o te Kaiga ke fakaasi a lotou mainaga i te tusi tena mo te aoga o ako-akoga kona ki olotou olaga. Mai te uke o fakaasiga konei, e mafai o faka maumea foki ei te iloa mo te malamalama i nisi tulaga o te olaga kola e seki fia ‘saga tatou ki ei. E mafai foki i konei o nofo tasi o Kaiga a te Nusileta tenei ke mafai o fakasoa atu a te fesoasoani tenei ki nisi Kaiga, i te agaga maulalo. Maise, mo tatou i loto i falemasaki, ke tumau ‘tou loto ma’losi.

No comments:

Post a Comment